GIILOG pagluba ang usa ka lalaki samtang nagbaklay atol sa Bag-ong tuig diha sa Piaping Itom, Barangay Macabalan, dakbayan sa Cagayan de Oro.

Patay si Justine David Caño, 28, adunay kaipo, taga Puntod ning dakbayan.

Sa impormasiyon nga nahipos gikan sa Northern Mindanao Medical Center (NMMC), nasayran nga gidala na lamang sa tambalanan ni Senior Police Officer 2 Terenzo Virtudazo ang biktima human nga nakitang naligo na kini sa kaugalingong dugo.

Gikabutyag sa taho nga nagbaklay lamang si Caño apan sa pag-abot na sa maong dapit kalit lamang kining gi-atangan sa wala mailang suspek ug gibira dayong dunggab sa liog hinungdan sa hinanali nga kamatayon.

Gisulayan pa sa pagtabang ang biktima ug gidala sa NMMC apan patay na kining nahidangat sa maong balay tambalanan.

Sa pagkakaron, padayon pa ang mga otoridad sa pag-imbestiga aron nga maila pagdali ang mihimo sa krimen kinsa gawasnon pa karong mga panahona.