MIMANDO si Pope Francis nga i-repaso ang Catholic church dogma o lagda sa simbahan kabahin sa vow of celibacy o pagdili sa mga pari nga makaminyo. Kini human ang mga Obispo ug Cardinal sa Brazil mihangyo sa Vatican nga tugutan nga makabalik sa mga buluhaton sa simbahan ang mga pari nga naminyo. Kini gumikan kay adunay shortage sa mga pari sa maong lugar.

Wala na siguroy intrisado nga mosulod sa seminaryo hinungdan nga adunay shortage sa kaparian. Well, ang Santo Papa ug kadagkuan sa Vatican ra ang makadesisyon niini. Lagda o balaod ra kini ug puwedeng ma-usab bisan unsang orasa kon maaprobahan.

Ubos sa lagda, ang usa ka pari gidid-an nga makaminyo o makabaton og pamilya. Kon makasupak siya, hukasan siya sa iyang ‘priestly functions’. Buot ipasabot nga dili na siya maka-perform sa buluhaton sa usa ka pari. Dili na makamisa, maka-officiate og kasal, bunyag ug pagbendisyon sa usa ka tawo nga himatyon na. Pero magpabilin ang iyang title nga pari. Kay matod pa sa panultihon nga ‘once a priest, always a priest’.

Unsa kaha ang linugdangan niini? Aw, daghan ang malipay labi pa kadtong mga pari nga adunay mga kulukadidang nga nagtago-tago lang. Mas dakong sala ang maong binuhatan nga ilang hilom nga gisupak ang lagda sa vow of celibacy. Sa panahon nga tugutan silang makaminyo, dili na sila magtago-tago ug dayag na kaayo ang ilang relasyon ug dili na sila makasupak sa lagda sa simbahan. Sama god anang mga pastor sa ubang tinuhuan nga mga minyo. Wala man na silay gitago.

Ang gikahadlukan siguro sa mga lider sa simbahan nga sa panahon nga tugutan nga makamimyo ang mga pari, makuhaan na ang amot sa simbahan. Kay aduna na goy buhion ang pari Makuhaan na ang amot o limos sa simbahan sa panggasto sa pamilya sa pari labi pa ang pagbuhi ug pagpa-eskuwela sa iyang mga anak. Mas maayo siguro nga hatagan na lang og fix salary o suweldo ang mga pari para sila na lang ang mag-budget sa ilang income. Pero louy intawon ang na-assign sa mga gagmay ug pobreng parokya. (bobbygnalzaro@gmail.com)