PADADA, Davao del Sur -- Gisilbi sa kapulisan ning lungsod ang orden de aresto batok sa usa ka biyuda nga gikasohan gumikan sa pagpamutol og lubi nga way permit, ala 1:39 sa hapon, Sabado.

Ang suspek nga si Norma Salado, 73, molupyo sa Purok 2, Barangay Tologan, nasikop sa mga awtoridad didto mismo sa iyang pinuy-anan.

Gibutyag ni Senior Insp. Jessie Dellosa, hepe sa kapulisan sa Padada Municipal Police Station nga gikan sa 3rd Municipal Circuit Trial Court (MCTC) ang warrant of arrest nga gilagdaan ni Presiding Judge Zarah Aguinsado-Silvosa.

Matud sa kapulisan nga kasong kalapasan sa Republic Act 8048 sa giamenda nga RA 10593 kun regulasyon sa pagpamutol og punoan sa lubi ang giatubang sa suspek nga nakadoket sa criminal case number 8674.

Subay sa maong balaod, hugot nga gibantayan sa Philippine Coconut Authority ang mga pananum nga lubi ug di basta na lang putlon kon way permiso kanila ug way igong rason.

Anaa na sa kustodiya sa kapulisan ang biyuda apan mahimo pa siyang makaangkon og temporaryong kagawasan sa piyansa nga kantidad P12,000. (OBD)