MIDEKLARAR og diarrhea outbreak ang Department of Health sa Central Visayas sa isla sa Carnaza, lungsod sa Daanbantayan, amihanang Sugbo, gumikan sa daghang mga kaso sa kalibanga nga natala sa dapit.
Si Rennan Cimafranca, pangu sa Regional Epidemiology and Surveillance Unit sa DOH 7, nibutyag nga sa 102 ka mga tawo nga nagkalibanga ug gipangsakitan sa tiyan diin ang uban nagsuka ug gihilantan, 11 niini ang nalandig sa Daanbantayan District Hospital ug pribado nga tambalanan sa lungsod.
Pulos na hinuon sila nakagawas sa mga tambalanan.
Siya nikompirmar nga kontaminado sa fecal coliform ang mga tinubdan sa tubig nga gigamit sa mga molupyo sa isla.
Matod niya sa walo ka mga atabay nga ilang gikuhaan og mga sample sa tubig, pulos kini nagpositibo sa presensiya sa kagaw nga gikan sa hugaw sa tawo ug mananap.
Bisan ang tubig nga gikuha gikan sa silingang lalawigan sa Leyte nga duol sa isla ug maoy gigamit usab sa mga residente sa isla sa Carnaza, kontaminado usab og kagaw.
Si Cimafranca niasoy nga nisugod og tumaw ang mga kaso sa kalibanga sa isla sa unang semana sa Pebrero ug nadungagan pag miaging semana.
Suma pa niya nga walo ka buwan nga masuso ang labing bata nga nagkalibang samtang nag-edad og 70-anyos ang labing hamtong.