NAWAGTANG ang 5-anyos nga pasayente uban sa mga ginikanan niini kinsa gituohang nilayas sa tambalanan tungod sa ka dako sa ilang bayrunon.

Nagpatala sa Police Station 2 sa Cogon si Edgar Bernaldez, sekyu sa usa ka pribadong tambalanan ning siyudad sa Cagayan de Oro kalabot sa nilayas nga pasyente nga dunay P335,000 nga bayrunon.

Nasayran nga magduha na ka bulan nga nadala sa tambalanan ang pasyente nga tungod kay gi-dengue.

Nakurat na lang ang mga tagdumala sa hospital nga nahanaw na ang pasyente ug iyang mga ginikanan.

Kahinumdoman nga niadtong milabay nga adlaw aduna usab natala nga milayas nga pasyente ug gibiyaan ang bayrunon niini nga mokabat ngadto sa P85,000 human nanganak nga caesarean.