MOBALOR P518 milyon nga kantidad sa farm-to-market road projects alang sa lungsod sa Manticao, Jasaan, Claveria, ug Balingasag ang gihatag gikan sa nasyonal nga budget.

Andam na kining i-implementar ngadto sa mga wala pa natapos nga mga proyekto sa mga nanganlan nga munisipyo.

Matud ni Misamis Oriental Governor Yevgeny Emano nga kining mga dalan nga himuon ang gikan sa Manticao paingon sa remote sa Limonda village, Jasaan ngadto sa Claveria, ug Balingasag ngadto sa dalan sa Claveria ug uban ba nga gikatakdang ikonkreto ning tuig.

“We are now in the bidding process and anytime soon these projects will be launched,” matud niini.

Mapasalamaton si Emano sa Department of Public Works and Highways (DPWH)- Misamis Oriental District sa pagtabang sa kagamhanan sa probinsya nga makumpleto ang programa ug proyekto nga gikinahanglan og maayo sa katawhan sa probinsya.

“Kung masemento na nato kini, mokunhod na unya ang ilang plitehan, sayon na lamang dayon kanila ang paghatud o pagdala sa ilang mga prutas ug gulay ngadto sa kamerkadohan. Maagian na dayon kini sa nagkadaiyang sakyanan. Pinaagi niini, molambo gayud ang atong katawhan dihang dapita,” matud ni Emano tungod kay mahal kaayo ang pangayo sa plite sa paghakot og mga utanon gikan sa bukid nga bahin sa dapit. (SVB)