SUBLI na sab nga miatake ang New People's Army (NPA) batok sa mga sundalo nga mibantay sa mga proyekto sa duha ka mga probinsya niadtong Lunes, Enero 30.

Si 10th Infantry Division (ID), Philippine Army spokesperson Captain Rhyan Batchar nagsulti nga dunay pagpangatake ang mga rebelde sa Sarangani ug Banana Plantation sa Compostela Valley.

Alas 2:30 sa hapon sa maong adlaw, gipaarakan sa mga rebelde ang tropa sa Bravo Company sa 73rd Infantry Battalion sa Barangay Banlibato, Alabel, Sarangani, diin ang mga sundalo nagbantay sa ongoing road project sa Jargon Construction Company.

Giingon sab nga gipakanaog ang mga pasahero sa van dayon gisunog ang sakyanan alas 6:15 sa gabii sa Crossing Tablao, Barangay Lebe, Kiamba, Sarangani.

Alas 7:40 sa gabii, suma sa report, gisulod sab sa mga rebelde ang Musahamat Plantation sa Barangay Union, Monkayo, Compostela Valley Province, diin gipangtionan og pusil ang mga guwardiya.

Mga rebelde malampusong milimas sa shot gun, kalibre .38 nga revolver, yawe sa backhoe ug dump truck lakip na mga cellphones.

"The 10ID condemns these atrocities which targets innocent civilians and our soldiers guarding development projects intended for the benefit of the people," sumala ni 10th ID commander Major General Rafael Valencia sa suwat pamahayag nga gipadangat sa media.