WA nay kausaban sa rota sa mga public utility jeepney (PUJ) nga gikan sa habagatang bahin sa Sugbo nga una nang giplanohan nga moagi sa Cebu South Coastal Road (CSCR).

Kini maoy nasabotan tali sa Dakbayan sa Talisay ug ni Director Ahmed Cuizon sa Land Transportation Franchising and Regulatory Board (LTFRB-7) kagahapon sa buntag.

Wa madayon ang dry run nga una nang nasabotan tali sa Traffic Management Board sa dakbayan sa Talisay ug sa LTFRB nga ang mga PUJ gikan sa Tabunok ug Pardo pasudlon na sa CSCR ug moliko sa may San Roque paingon sa Cebu City.

Kini tungod sa pagsupak ni Gullas tungod kay makapasamot sa kahuot sa trapiko.

Si Cuizon niingon nga nakahukom siya nga wa una silay usbon sa rota aron wa nay kalibog pa.

Ang Kagamhanan sa Dakbayan maoy ilang hatagan og higayon nga makapangitag pamaagi nga moluag ang dagan sa mga sakyanan sa N. Bacalso bisan sa nagpadayong gitukod nga underpass project sa N. Bacalso ug dalan F. Llamas.

Gipasabot ni Cuizon nga tanang PUJ sa habagatang bahin lakip na ang sa Talisay mosubay sa naandang rota. (DRT)