MAANINDOT ang gihimo nga lakang ni Gobernador Hilario Davide III sa pagtudlo og focal person sa trapiko kay dunay kahibawo tungod sa mga pagbansay ug seminar nga gitambungan sa dihang siya pa ang pangu sa operations sa Cebu City Transportation Office (CCTO).
Si Joy Tumulak, kanhi kauban namo sa Sunstar, mao ang operations head sa CCTO sa panahon ni kanhi mayor Michael Rama. Karon, ang iyang kahibawo maoy gigamit ni Davide sa pagsulbad sa nagkagrabeng kahuot sa trapiko sa Metro Cebu.
Apan segurado kong nakahibawo na si Joy nga sama sa Cebu City, i-manage na lang gyud ang kahimtang sa trapiko aron maluag luagan ang dagan niini kay nakahibawo siya nga ang atoang kadalanan di paigo sa gidaghanon sa mga sakyanan karon.
Dunay sugyot si Joy nga usa sa mga sulbad niini mao ang paghimong flexible sa oras sa tig-report sa trabaho ug uban pa. Sa tinud-anay lang, epektibo ni kay sa ubang mga nasod gigamit ni. Ang usa nako ka higala nga nagbase na karon sa Las Vegas, niingon nga sa ilang dapit, lainlaing oras ang pagbukas sa mga balay patigayon ug mga tunghaan. Ang katuyoan niini aron di magdungan sa pagpanggamit sa karsada ang publiko.
Kay lahi usab ang oras sa pagbukas, lahi usab ang oras sa pagsirado. Busa, di magdungan sa pagpauli ang mga tag-iya og sakyanan. Matod niya, epektibo ang mao nga scheme. Gigamit kini nila bisan ang mga karsada mas lapad itandi dinhi sa atoa.
Gihunong
Sa China, dunay mga siyudad nga gihunong ang pagbaligya og mga sakyanan. Kay bisan lapad ang mga karsada didto, naapsan kini sa volume sa trapiko matag adlaw. Dinhi sa ato, bisan mitaas ang buhis sa mga sakyanan nga pamaliton, daghan gihapon ang namalit. Kini tungod sa paglambo sa atoang ekonomikanhong kahimtang.
Kon di magbukas og laing mga karsada, sama sa gisugyot ni kanhi GSIS head Winston Garcia, moabot ang panahon nga mograbe pa ang suliran sa trapiko sa south, gikan sa Talisay lapas na sa Carcar. Niini, gikinahanglan usab ang maayong public transport, sama sa monorail. Mas pabor ko niini kay sa mga bus kay mas mas paspas ug daghang pasahero.
Pag-alibyo
Mao na nga ang mahimo ra nila ni Joy ug mga kaubanan, mao ra ang pag-alibyo sa kasamtangang suliran sa trapiko. Pang short term kini nga kasulbaran. Ang tinud-anay nga bola sa pagsulbad, naa sa mga kamot sa dagkong mga opisyal sa kagamhanan.
Sa pagkakaron, gikinahanglan ang pagpatuman sa balaud sa trapiko ug uban pang mga polisiya. Niini, mapuslan ni Davide ang kahibawo ni Joy ug kaubanan.