PAG-AMPING kanunay ang panawagan karon sa Philippine Institute of Volcanology and Seismology (Phivolcs)-Northern Mindanao sa katawhan sa rehiyon hilabina nga sunod-sunod ang nasinating linog ning panahona.

Gibutyag ni Phivolcs-Northern Mindanao Regional Director Marcial Labininay nga dili matagna ang maong kalamidad hinungdan ang pagbantay ug pagpangandam lang gyod ang importante.

Daw dinhi sa dakbayan sa Cagayan de Oro wala silay nakitang milihok ang fault line nga doul lamang niini nga mao ang Tagoloan fault hinungdan dili ra kaayo mahadlok ang katawhan. Gikasubo nga gisulti ni Labininay nga dili pa madeterminar ang fault sa Wao tungod kay dili kini stable ning panahona.

Apan sa iyang bahin Office of the Civil Defense Regional Director Liza Mazo gibutyag niini nga delikado sab kung ang mga dakbayan maoy maapektuhan sa linog gumikan kay daghan gyod kaayo ang maapektuhan lakip na ang damyos.

Kini tungod kay mga dagko na ang mga building sa dakbayan ug adunay pipila nga mga building nga sikit pa sa mga kabalayan hinungdan kinahanglan gyod magbinantayon ang katawhan. (SVB)