NAMATAY ang gikatahapang pusher sa dihang nisuway og sukol sa kapulisan sa dakbayan sa Mandaue atol sa buy-bust operation sa CICC, Mantawi Drive, Brgy. Guizo, sa dakbayan niadtong Biyernes sa hapon.
Ang suspek giila nga si Vonjie Policious, alyas Bonjing, lumolupyo sa maong dapit.
Matod ni Mercy Villaro sa Mandaue City Police Office nga ang suspek notadong pusher sa dapit.
Atol sa operasyon pasado alas 3 sa hapon, giingong gipalitan si Bonjing sa usa ka poseur buyer nga pulis.
Human sa transaskyon, si Villaro niingon nga daw nakabantay si Policious nga pulis ang nipalit kaniya.
Kini maoy hinungdan nga nibunlot kini sa iyang armas ug nition sa kapulisan.
Apan napakyas sa pagpabuto si Bonjing sa dihang naunhan og pusil sa otoridad aron kini- ma-neutralize.
Si Bonjing usa sa mga napatay sa kapulisan sa dakbayan sa anti-drugs campaign.
Saysay ni Villaro nga dali pa nga gidala sa tambalanan ang suspek apan gideklarar nang dead-on-arrival sa doktor.
Mga ebidensya nga narekober sa kapulisan gikan sa suspek naglakip sa usa ka .38 kalibreng revolver nga may upat ka mga bala, usa ka paketeng shabu ug usa ka P500 nga buy-bust nga kwarta. (JPP)