TALIWALA sa deklarasyon nga usa ka special non-working holiday ang Enero 2, 2017 gisugdan sa buhatan sa City Treasurer sa Lapu-Lapu ang pagpanawat sa renewal sa Mayor’s Business Permit alang ning tuiga.

Mipagawas og kamanduan si City Mayor Paz Radaza nga nagpahibawo niadtong nanag-iya og patigayon ingon man ang mga establisemento sa Lapu-Lapu nga kagahapong adlawa gisugdan ang renewal of Mayor’s Business Permit.

Ang buhatan sa city treasurer bukas gikan sa adlawng Lunes ngadto na sa Biyernes gikan sa 8:00 sa buntag ngadto na sa 8:30 sa gabii.

Abli sab ang ilang buhatan bisan nga holidays, ingon man sa adlawng Sabado ug Domingo (Enero 2, 7, 8, 14 ug 15) sa 8:00 sa buntag ug 5:00 sa hapon.

Sa kadtong mapakyas sa pag-renew sa nahisgutang mga petsa o molapas na sa Enero 20, 2017 adunay 25 porsiyento nga surcharge sa total assessment ug dos porsiyento nga interest matag buwan.

“Additioinal penalty for non-compliance of previous year’s deficiency,” tipik sa natala sa maong pahibawo nga pinirmahan ni City Treasurer Elenita Catagcatag.

Kahinumduman nga sa miaging tuig ang Lapu-Lapu nakadawat og pasidungog gikan sa Bureau of Local Government Finance (BLGF) tungod sa labing dako nga kita gikan sa mga local taxpayer sa tibuok Central Visayas.