NAA pa dinhi sa Sugbo ang ubang miyembro sa Korean Mafia nga maoy responsabli sa pagpangilkil ug ubang krimen sa ila ra usab nga mga kaubang Koreano.
Sa miaging hapon nagtagbo ang mga opisyal sa Police Regional Office 7 uban sa Philippine Drug Enforcement Agency ug ang Korean Consul ug Police Attache sa maong nasud nunot sa giingong presensya sa Korean Mafia nga naglihok sa Sugbo.
Matod ni Chief Supt. Noli Taliño dinhi ilang nasuta pinaagi sa pag-angkon sa usa ka police attache nga dunay nahitabong mafia operation niadtong tuig 2009 ngadto sa 2013 diin ang mga biktima pulos mga Koreano ra usab.
Kamatuoran niini ang nahitabong pagsunog sa magtiayon sud sa usa ka sakyanan didto sa dakbayan sa Danao nga ang mga suspek usa ka negosyante ug sakyanan.
Tungod sa maong mga panghitabo naalarma ang nasud sa Korea nga maoy hinungdan nga nagpadala sila og mga police attache dinhi sa Sugbo aron maoy motutok sa maong mga kaso.
Aron mahatagan pa og pagtagad ang ilang problema nagbutang usab ang PRO-7 ug Koreans desk sa matag police office nga maoy moatiman kung dunay krimen nga naglambigit sa mga Koreano.
“Nagkaroon nga nang mafia operation dito between 2009 to 2013. Specially in 2013 nung mayroong sinunog na dalawang tao sa Danao,” matod ni Taliño.
Nagtuo ang kapulisan ug ang Korean Consul sa Sugbo nga naa pa dinhi ang mga miyembro niini kay dili na kini makauli sa ilaha tungod sa giatubang nilang kaso didto sa ilang nasod.
Dunay gitug-an nga personalidad ang Korean police attache nga maoy basehan unya sa ilang pagpangita niini inabagan sa kagamhanan sa nasud sa Korea.
“Ang sabi nang Korean police baka nandito sila nagtatago hindi na nag operate, Yan yung bina validate nang ating kapulisan ngayon kung may mga operation pa sila,” dugang sa General.
Lakip sa gipa imbestigar karon ni General Taliño ang kalambigitan sa mga police dinhi sa Sugbo nga nakigkunsabo sa Korean Mafia nga maoy modakop sa mga inosenting Koreano aron kilkilan.
Apan si PDEA-7 Director Yogi Filemon Ruiz miklaro nga walay Korean Mafia nga nalambigit sa negosyo sa illegal nga drugas sanglit kasagaran sa ilang nakuha nga kasayuran mogamit lang kini ug walay namaligya nga dinagko.
“Wala tay indicators nga naay mafia ang koreans diri sa Cebu sa illegal drugs pero dili ko ka estorya sa ubang krimen kay sa police naman na,” matod ni Ruiz.
Makigtambayayong karon ang mga opisyal sa nasud sa Korea ug ang kapulisan dinhi sa Sugbo aron sa pagpangita nisa Bureau of Immegration alang na sa pagsusi kung nakagawas na ba sa nasud ang ubang personalidad nga naa sa listahan sa korean police attache.