"Love is best expressed by sacrifice, prayer and giving," ang pinakauyokang mensahe ni Arsobispo Socrates Villegas sa Dagupan.

Sakripisyo... Pag-ampo... Pagpanghatag... mao kini ang mga pulong nga sa kanunay nga nagabagting sa atong mga dalunggan panahon sa pagsaulog sa kuwaresma.

"It's clear in the Gospel that fasting and penance goes beyond giving something up during Lent," dason ni Bishop Virgilio David, dugang pa niya "Church cannot ignore suffering and urged the people to do concrete actions of charity".

Gihagit na usab ang mga Kristiyanos ug dili kristiyanos sa pagpakabana ug paghatag og panahon ngadto sa atong mga kaigsuonang kabus, linupigan ug timawa.

Nahimong tradisyon sa Katolikong simbahan nga panahon sa kuwaresma nga hatagan og importansiya ang mga kaigsuonan nga nagkinahanglan og tabang.

Kini mao ang tinuod nga gugma nga angay ipakita sa usag-usa ngadto sa uban.

"Our faith must be matched with concrete expressions of charity and love for others," ang dugang mensahe sa bise president sa Catholic Bishop Conference of the Philippines Virgilio David.

SAKRIPISYO. Ang tinuod nga paghigugma mapadayag diha pinaagi sa tinuod nga pagsakripisyo uban sa imong mga hinigugma ngadto sa uban. Gitahasan kita sa pagpuasa ug pagpugong isip timaan sa pagsakripisyo.

Ang pagpuasa ug abstinensya maoy konkretong buhat sa paghigugma. Imbis mokaon ta og daghang karne o mga lamiang pagkaon, ato kining isakripisyo pinaagi sa atong pagpaambit niini ngadto sa uban nga mas nagkinahanglan pa niini.

Dili kita mokaon o moinom og daghan sama sa naandan aron ang mas daghan pang gigutom karon makaambit pa og mas daghan pang pagkaon.

"It is a 'grave sin' when people turn away from the needs of others or when they grow indignant at evil but do nothing about it," ang gitumbok ni Obispo Broderick Pabillo.

Laing gimbuhaton nga angayan hatagan og pagtagad mao ang pagpugong ug paglikay gikan sa mga dautang bisyo, law-ay nga binuhatan, sugal, sobrang inom, kahilayan ug uban pang mga lawasnong makatagbaw ug kailibgon.

PAG-AMPO. Ang tinuod nga paghigugma mapakita sab nga buhi diha pinaagi sa malahutayong pag-ampo. Nakat-onan sa kadaghanan nga ang pag-ampo maoy pinakagamhanang taming batok sa mga kaaway ug mga dautan. Kini tungod kay diha sa makanunayong pag-ampo, anaa kanunay ang presensiya sa Ginoo.

Niining panahon sa kuwaresma, dunay panginahanglan sa buhi nga pag-ampo aron ang presensiya sa Ginoo maanaa kanunay sa pamilya ug katilingban.

Kung ang pamilya mag-ampo kanunay, magkahiusa sab kanunay.

Imong ilhon ang personal nimong Ginoo nga mahigugmaon dili lang sa istorya kon dili sa diwa sa kahilom ug mapamalandungon.

Pagdayeg, pagpasalamat, pangaliyupo, pagpasaylo ug kalooy maoy kinaiya nga angay huptan diha sa diwa sa pag-ampo. Kay ang buhing pagpadayag sa pag-ampo maoy bunga sa kalig-on sa imong pagtoo.

PAGPANGHATAG. Ang buhing gugma mapakita sab diha ug pinaagi sa pagpanghatag. Ang gugma sa iyang pagkaanaa manggihatagon gyud. "You can give without loving but you cannot love without giving," pulong ni Villegas ug dugang pa niya "We must love until it hurts".

Ang pagpanghatag mas labing maayo kay sa mangayo. Kay kinaiya sa usa ka tawo nga manghatag, dili niya kinaiya nga mangayo. Ang gugmang matuod manggihatagon nga dili maghulat kon kanus-a balusan o suklian.

Himuon natong kinaiya ang pagkamanggihatagon, walaon na nato ang pagkadalo o pagkahakog. Huptan nato ang diwa sa buhing gugma sa kuwaresma. Likayan na unta ang pagpakasala gikan sa paghilabot sa mga butang nga dili imoha ug pagpangurakot.

"One of our biggest sin of omission is us neglecting our nation. We refuse to be vigilant," matud ni Bishop Pabillo. "It seems that it is okay for us that there are still corrupt officials out there, that there are several killings, that there are people uttering foul words. We do not say anything and just allow it to continue."

Responsibilidad sa usag-usa, Kristiyanos man o dili, nga mamalandong ug maghinulsol sa mga sala nga nabuhat labi na sa mga kapakyasan sa pagbuhat sa ilang mga gimbuhaton sa pamilya ug katilingban.

"We have a social responsibility, which if we fail to do, is a grave sin. So let us open our minds and hearts during this time of repentance," dugang ni Bishop Pabillo.

Sa katapusan, magtambayayong ug maghiusa ta sa pag-ampo ug pagpalambo sa tinuod nga mensahe sa kuwaresma, ang paghigugma sa Ginoo ug sa atong mga kaigsuonan. Hinaut pa unta.

(Feedback/comment lang sa 09109006290)