UGMANG adlawa na madawat sa senior citizen sa dakbayan sa Sugbo ang P2,000 nga financial assistance isip sugod karong tuiga.

Samtang si Cebu City Mayor Tomas Osmeña gusto nga sa Barangay Hall sa mountain barangays ipanghatag ang financial assistance ug di na sa public schools.

Alang sa 2017, unang P2,000 nga madawat sa senior sa Cebu City ang ipanghatag na ugma.

Matod ni Domingo Chavez, ang pangu sa Office of the Senior Citizens’ Affairs (OSCA), nga 67,300 ka mga senior ang makadawat sa assistance.

Giklaro usab niini nga Agosto 8, 2016 ang cut-off sa kasamtangan nga listahan nga ilahang hataganan og hinabang.

Samtang kadtong naka-file human sa cut-off sa sunod na nga distribution kini makadawat.

Sumatotal moabot sa P134 milyones ang ipanghatag ugmang adlawa sa Cebu City Hall.

Susama sa nangagi nga distribution, sa naandan nga lugar o sa pampubliko nga tunghaan ra gihapon kini ipanghatag diin ang mga kawani sa city hall ang motunol niini lakip ang mountain barangays.

Alang sa 2017 adunay kapin P807 milyones ang ipanghatag sa Cebu City isip hinabang sa senior.