TALIWALA sa pagpangatake ni Presidente Rodrigo Duterte sa Simbahang Katoliko sa nasod ang Archdiocese sa dakbayan sa Cagayan de Oro nipaabot nga dako sila og tabang sa giyera batok ginadili nga droga tungod kay ila kining gisuportahan.

Kini ang gibutyag ni Monsignor Precious Cabunoc, Kura Paruko sa St. Augustine Church ug niingon nga kung moingon si Duterte nga walay natabang ang simbahan iyang klaruhon nga dako ilang natabang sa giyera kontra droga.

Dinhi sa dakbayan moabot sa 20 ka mga barangay ang ilang natabangan labina niadtong mga surrenderee ug gipaubos sa rehabilitasyon.

Gani nagpadala sila og mga bugas o uban pang matabang sa mga natoktok hangyo atol sa ilang rehabilitasyon nga gihimo.

Gawas niini, miboluntaryo sab sila sa paghatag og giyang spiritwal niadtong mga surrenderee kon mga drug user.

Kahinumduman ang simbahang katoliko sab ang nagpatawag sa mga drug user dinhi sa dakbayan aron sila magiyahan ug mobalik sa normal nga pagkinabuhi.

Hinuon wala na mihatag og reaksyon si Cabunoc sa mga pagpangatake ni Duterte sa simbahang katoliko apan giklaro lamang niini nga suportado nila ang giyera batok droga apan kining pagpamatay ang hugot nilang gikondena. (SVB)