SA pagsaulog sa adlaw nga natawhan, makadawat ang tawo og lainlaing mga gasa gikan sa iyang mga minahal sa kinabuhi o higala.

Kini nga mga gasa kay espesyal, talagsaon ug wa damha.

Sama pananglit ni Eddil Cañete, dili makalimtan ang duha ka mga gasa nga sayo niyang nadawat tulo ka sema­na sa dili pa ang ika 34 nga kasumaran sa iyang adlaw nga natawhan niadtong Hulyo 27, 2017.

Espesyal kini tungod kay uban niini ang pasidungog ug garbo alang sa Pilipinas labi na sa mga Sugbuanon.

Dili kini bastabasta kay gold ug silver medals ang iyang nadawat gikan sa prestihiyoso nga World Championship of Performing Arts nga bag-ohay lang gipahigayon sa Long Beach, California, USA sayo ning buwana.

Sa Team Production Performance, nalangkat sa Pilipinas, gilangkoban sa 25 ka mga partisipante apil si Eddil, ang gold medal alang sa ilang pasundayag, kombinasyon sa kanta ug sayaw, sa kanta nga “Piliin Mo ang Pilipinas" ni Angeline Quinto.

Nalangkat usab ni Eddil ang silver medal, labing taas nga award sa vocal broadway sa 30 years old and over category pinaagi sa iyang gikanta nga “Corner of the Sky” nga gi-popularize ni Basil Valdez sa Broadway Musical nga “Pippin.”

Ang inila nga singer nga si Jed Madela, ang ilang coach sa kompetisyon.

Si Eddil niapil usab sa laing duha ka category, ang Pop ug Gospel, diin iyang gikanta ang “Let's Make a Memory” ni Rex Smith alang sa Pop ug “One Voice” ni Barry Manilow. Wa siya'y nadawat nga medal.

Siya niangkon nga sa wala pa siya mopasundayag, dili tiaw ang iyang gibati nga kakulba sanglit pulos mga maayo ang iyang mga nakaatbang.

Si Eddil nag-ampo ni Santa Rita ug sa Our Mother of Perpetual Help nga giyahan siya sa iyang pasundayag.

“Pagkanta nako, I was guided. Wala ko ga-expect naa pa diay ko ikabuga sa akong ti­ngog,” asoy niini.

Tuod, nipatigbabaw ang ta­lento sa Sugbuanon nga si Eddil nga emosyonal nga nidawat sa iyang mga medalya.

Matod niya way kabutangan sa iyang kalipay sa sayo nga birthday gifts nga nadawat ug siya mapasalamaton sa mga tawo nga nipaluyo sa iyang biyahe sa WCOPA.

Apil niini ang mga nipahuwam sa iyang mga gipangsul-ob sa matag pasundayag sama nila ni Pamela Romualdo ug Joshua Ortega.

“I am no longer perfor­ming for myself but for the Filipinos. Never give up on your dreams,” dugang ni Eddil nga mensahe niini alang sa kabataan nga nangandoy sama niya makahatag og dungog sa nasod. (SCG)