HUMAN sa taodtaod nga pagpaalim, moduwa na sa unang higayon si Isaiah Thomas isip usa ka Cavalier karong adlawa sa dihang ikasangka sa Cleveland ang Portland TrailBlazers sa National Basketball Association.

Hinuon gipasabot ni Cleveland coach Tyronne Lue nga dili pa kaayo niya mahatagan og saktong playing time si Thomas kinsa nakaangkon og injury sa iyang hawak atol sa Eastern Conference finals sa niaging season sa dihang ubos pa siya sa Boston Celtics.

Sa niaging summer, sa wala damha kalit nga gi-trade siya ngadto sa Cleveland baylo ni Kyrie Irving sa usa ka blockbuster nga binayloay og player.

Sukad sa maong trade, wa pa gyud makapakita og aksyon si Thomas.

Hinuon nakahukom si coach Lue nga dili niya paduwaon si Thomas batok sa Celtics ugmang adlawa. (JBM)