WALA na mahitsura sa kadaghang bun-og nga nahiagoman sa usa ka 19-anyos nga pedicab driver human gitabangan og kulata kay nangumot og 'boobs' sa iyang mga pasahero.

Sabado sa gabii gitabangan og kulata didto sa Poblacion sa Toril ang suspek nga si John Rey Bangoy Sasuman, 19, residente sa Manggahan, Barangay Lubogan, Toril District, dakbayan sa Davao.

Una niini, trese na ka mga babaye ang nagpa-blotter sa Women and Childrens' Protection Desk (WCPD) sa Toril Police Station human gipanghimas ilang dughan dayon kumuton sa suspek sa managlahing mga adlaw.

Niadtong Sabado, Oktobre 8, usa ka Merly (bansagon gitago sa Superbalita), 27, nagpatabang sa iyang bana nga naggunit sa ilang anak nga anaa misakay sa likod sa pedicab.

Giingong wa nabantayan sa suspek nga naa diay ang bana sa babaye sa likod sa pedicab nagsakay mao nga iyang gihimas dayon gikumot ang dughan sa babaye.

Tungod sa kakusog sa pagkumot, misidlit ang gatas sa babaye mao nga nangayo siya og panabang sa bana.

Ang suspek gitabangan pagkulata sanglit notado na siya sa dapit nga gipangumot og dughan sa iyang mga pasahero.

Ang investigation section sa Toril Police Station nag-asoy nga kanunay magmaskara ang suspek aron di mailhan sa iyang mga biktimahon.

Giingon sab nga human nadakpan ang suspek, usa ka alyas Maricel, kinsa kapuyo sa suspek, ang miduaw sa prisohan.

Human gitambalan ang suspek sa ospital sa Toril, gibalhog siya sa selda aron atubangon ang kasong acts of lasciviousness sa korte.