DUHA ka mga hangyo ang ipaabot sa National Confederation of Transportworkers Union-Visayas sa Department of Transportation (DoTr) ug Land Transportation Franchising and Regulatory Board (LTFRB) sa pagpatuman sa Public Utility Vehicle Modernization Program.
Si Romeo Armamento, national vice president sa NCTU-Visayas, namahayag nga una nilang hangyo sa gobiyerno nga apilon ang mga transport group sa diskusyon sa pagpatuman sa gobiyerno sa dili pa mopagawas og implementing rules and regulations kabahin sa PUV Modernization Program.
Gipasabot ni Armamento nga kinahanglan nga maapil sila sa paghukom aron dili momugna og kagubot sa sektor nga direktang maapektohan.
Matod niya, sa ilahang nakita karon, wa sila konsultaha sa gobiyerno sa mga plano niini pagmoderno sa mga publikong sakyanan nga nagdagan sa kadalanan sa nasod.
Lain nilang hangyo mao ang pag-umol sa gobiyerno og appraisal committee nga maoy mosusi ug mo-appraise kon pila ang kantidad sa karaan nga mga public utility jeepney nga maapektuhan sa higayon sugdan na ang programa.
Kini nga mga hangyo ipaabot nila sa mga opisyal sa DoTr ug LTFRB pinaagi sa ilang petition nga ilang iduso karong semanaha.
Si Armamento namahayag sa ilang petition, dunay malakip nga probisyon diin dunay unom o walo ka buwan nga katungod ang mga operator sa pagbalibad kon giminosan ra kini sa resulta sa appraisal sa appraisal committee sa kagamhanan.
Suma pa niini kon mauyon ang usa ka operator sa appraisal sa komitiba, ang bayad nga madawat niini sa iyang karaang sakyanan maoy gamiton pagbayad sa equity aron makapalit og bag-ong unit.