HABWA ang tina-e sa usa ka ulitawo human giluba sa karibal niini gumikan sa grabe nga selos niadtong Domingo alas 11:30 sa gabii sa Zone 2, Cugma, Dakbayan sa Cagayan de Oro.

Nalandig sa tambalanan si Vincent Moral, 21, ulitawo ug lumulupyo sa nahisgutang dapit.

Subay sa sulti sa barkada sa biktima nga gipareglahan kini.

Gi-ingong gumikan sa grabe nga selos sa karibal niini tungod sa usa ka babaye kinsa hinigugma sa biktima ang hinungdan sa maong pagpangdunggab.

Kalit nga gidunggab sa wala gikabutyag nga suspetsado si Moral diha sa tiyan nga bahin hinungdan sa grabe usab nga naangkon niini nga samad.

Walay panimuot nga gidala sa Northern Mindanao Medical Center (NMMC)ang biktima human sa maong insidente.

Nagpabilin pa nga nagpatambal sa samad dinunggaban ang biktima sa NMMC.(KCS)