SIKOP ang usa ka ulitawo human nga gitunol ang warrant of arrest sa kapolisan niadtong Lunes sa hapon, Pebrero 13, sa Barangay 33, dakbayan sa Cagayan de Oro.

Ang dinakpan naila nga si Joeberth Yuco, residente sa Relocation site, Balangiao, Indahag ning dakbayan.

Sa nahipos nga impormasiyon gikan sa Police Station 2 sa Cogon, nasayran nga nasikop ang suspetsado human nga gitunol ang warrant of arrest sa pagpangulo na usab ni Police Inspector Johnny Agutaya ug ubos sa superbisyon ni Police Station 2 Chief Gilbert Rollen.

Nasayran nga adunay kasong pagpanglugos o Statutory rape nga gi-isyu ni Judge Evelyn Gamotin Neri sa Regional Trial Court (RTC) Branch 37 diin wala kini piyansa alang sa temporaryo nga kagawasan.

Ang warrant of arrest usab giisyu ni Judge Richard Mordeno, sa RTC Branch 22 ug wala usab kini piyansa nga gi-rekomenda.

Sa pagkakaron, ang suspetsado ang kasamtangang anaa na nagtingkagol sa bilanggoan alang sa pag-atubang sa kaso niini.