NIPASALIG si Mayor Eduardo Gullas nga walay umento sa abangan sa bag-ong merkado sa Tabunok, dakbayan sa Talisay nga gikatakdang mahuman karong Oktubre, samtang ang phase 1 motapos sa sunod buwan.
Una niini, si City Treasurer Emma Macuto nibutyag nga mosaka unya ang ilang panudlanan sa higayon nga maka-operate na og balik ang ilang merkado tungod kay aduna man silay gidugang nga mga tindahan nga mahimong maabangan.
Apan wala isalikway ni Macuto ang posibilidad nga adunay pagsaka sa abangan tungod kay gawas nga bag-o ang pasilidad aduna sab silay target nga kinahanglang mosaka ang ilang income.
Si Mayor Gullas niingon nga walay ipatuman nga umento sa ilang abangan iyang gipasabot nga aduna man usab silay gitanyag nga mahimong maabangan sa mga bag-ong magpapatigayon diha sa maong merkado.
Gibutyag ni Gullas nga aduna siyay hulmahon nga Talisay City Enterprise Investment Board nga maoy moatiman sa mga pasilidad sa Talisay nga adunay income sama sda ilang ihawan.
Hinuon si Macuto daan nang mibutyag nga kon dunay umento dili usab dako tungod kay ang kuwarta nga ilang gigamit pagtukod og bag-ong merkado wala man giutang sa banko ug wala silay apason nga bayranan.
Sa miaging semana, ang Bids and Awards Committee (BAC) ni-award na sa Tuanson Construction, nga kontraktor sa phase 1 ug nidaug usab sa phase 2 sa kantidad nga kapin sa P97 milyones.
Samtang sa phase-3 alang sa sewage treatment plan si City Budget Officer ug BAC Chairman Edgar Mabunay miingon nga ila na usab unya kining i-award sa IM. Bongar Co. Inc.human nila Makita ang trabaho sa maong kontraktor sa kaulohan samtang legal usab ang ilang mga dukomento.
Ang Sewerage Treatment Plan sa maong merkado mokantidad og 15 milyones apan ang nakadaug sa bidding ang IM. Bongar Co. Inc. mokantidad lang og kapin P11 milyones.