“Ngana ning Ginung Kris’na kang Ardyuna:

‘O Ardyuna! Marirandam kang masalese.

Neng ing mabibye lelangan gagale ne ing lagyu Ku,

kapamilatan ning pamitagulaling o kelangmasabal,

e Ku kakalingwan ing dapat ayni.

Mandatila parating malapit king pusu Ku.

Alang tipan a migit pa king pamigale

king Nwan a Lagyu, o belwan a daraig pa kaniti,

alang pamigunamgunam a malapit

agyang makananu man kaniti,

at ipagkalub na ing pekamatas-diling bunga.

Alang pamagsalbat a katumbas niti,

at alang kasing kasikan o kasingupaya

ning Nwan a Lagyu.”

“Ing pamigale ing pekadakilang pamanyamba

at pekamatas-diling santungan.

Agyang ding amanu ding Aklatbelwan (Vedas)

e da atatagle ing makagyung upaya

bang ilarawan ing sikanan na.

Ing pamigale ing matas-diling dalan papunta

king kalayan, kapayapan at alang-anggang bye.

Iti yang simboryu ning pamitagulaling,

ing pekamatulang gawi at yagyag

at ing pekamayap-diling aske ning pamiganaka

king Kakataskatasang Ginu.

Ing Nwan a Lagyu pepalto Ya

para mu king pakinabang

ding sablang mabibye lelangan

anting karelang Ginu at Panginwan,

ing kakataskatasang sasambang bage

at pangdiwang talapatuntun at talaturu.”

~ Mapilang Sunis king Aklat

“Kamumulan a Pamipasyag”

(Verses from Adi Purana)

***

Ding sunis a mesambitla babo dagdag lang patune a ding Nwan a Lagyu ning Ginu ilang sukat sambitlan, tunggen, igale at idalit anting paralan king pamanyamba, pamipaligaya, pamipuri at pamiparangal king Apung Ginu. Ken mung aklat ding Dalit o Psalms king Biblya ating pitumpulung sunis a babanggit king ulaga ring Nwan a Lagyu. Dakal mu naman a sunis karing miyayaliwang aklat king Biblya. Mangabaldugan a antita la kaulaga, kayupaya at sikanan deti.

Agyang ing tiru nang pangadi ning Ginung YesuKristo (king Ibpa Mi), masasabi a “misamban Ya ing Lagyu Mu keti sulip anti banwa.” Malyari Yang samban ing Banal a Lagyu ning Dyos uling Ya at ing Lagyu na ala lang pamiyaliwa. Ing upaya ning Ibpa ati mu naman king Nwan nang Lagyu. Inya sa’t ing makasdan a miyayaliwa la sasamban dapot o’t ali de sasamban ing Nwan nang Lagyu ning Ginu ding meyaus a “talasampalataya”?

Magdalit la karing pisamban miyayaliwang dalit dapot malagad pa king kildap king kaleldo ing pamigale karing Nwan a Lagyu ning Dyos karing kapagmasusyan karing segana-ganang pisamban at kasalpantayanan. Magdalit la dikil king kaligtasan o pangakabus da king alang-anggang parusa (e naman tutu) dapot e da la daralit ding Nwan a Lagyu. Bakit?

Mangabaldugan mu naman a deti mu ring kaylangan a paralan para king pangakabus tamu agya mang aliwa iti ing tune dapat maging parasan tamu, nung e ing nung makananu tamung dasan ing tuntungan ning pamaglugud king Apung Ginu. Ing parasan tamu aliwa ing kaligtasan o pangakabus king alang-anggang parusa o “hell” uling ala namang alang-anggang parusa. Uling ing tutu ya pin ing alang-anggang lugud at pakalulu ning Ginu kekatamu lakwas na karing pekamakasaldak o pekamakasalanan.

E wari, masasambitla king Biblya a ing Ginung YesuKristu lakwan na la ring dakal o kawan ding tupa ba’n’ya mung pantunan at ibalik king sabsaban na ing malililing tupa agyang magdili-dili ya mung pagdulapan na?

King Mateu 18:12-14, masasabi:

“Ngayupaya? Nung ing tau atin yang sese dinalan a tupa, at ing metung karela melili ya, e na la wari lakwan ding syam a pulu king bunduk at mako ya bang pantunan na ya ing metung a melili? At nung atagmwan ne iti, sabyan kung kamatutwanan kekayu, tumula ya para kaniti migit karing syam a pulung melili. Inya sa’t e na kaburyan ning Ibpa mung ati Yu banwa a ing metung karing mangalating a reni mabating la.”

Antita tamu kaulaga king Ginu. E na Ya paymburisan agyang metung ya mu at makasalanan ya man. Inya sa’t gewa nang saguli ing pamaglapit Kaya—ing pamigale king Nwan nang Lagyu.

***

Dake Talabaldugan:

1. mimiwas (pangdiwa) mangilag, darayu o sasalikut bang e alapitan, e akit o e akayabe; amanung mekad Tagalug dapot maralas magagamit kareng kayanakan at taung lungsud. English – evading, eluding, dodging, avoiding, steer clear of, run away from, break away from, leave behind. Alimbawa king pamangamit: “Nung kapilan ya mimiwas kareng inanak na lakwas de pang penintun ing tegawan dang salasalikut karela.”

2. mimukmuk (pangdiwa) mapilitang magmukmuk agyang e kaburyan. English – have no choice or involuntarily sulk, mope, brood, pout; be silent, morose, and bad-tempered out of annoyance or disappointment. Alimbawa king pamangamit: “Nung patulan mu ing mangapalyari ngening kasalungsungan, keraklan mimukmuk na ka mu uling ala na ka mang akarapat.”

***

MIKASING-KABALDUGANG at MISALUNGAT

KABALDUGANG AMANU TAMU

paymburisan – e pansingan, e lingunan, e dinan ditak mang penandit bang e makalapit o makapanyawad saup o nanu man.

pabustan – lumang amanung anti king “paymburisan” a kalupa na kabaldugan a malagad na mu namang magagamit king kasalungsungan.

paburen – maralas a magagamit amanung kasingkabaldugan ding paymburisan at pabustan a keraklang masasabi king kasalungsungan karing keraklang kabalen a Kapampangan.

kalingwan – e na ganakan, paburen makalingwan bang e na lingunan o pansingan.

iwaglit – ilako king pansing o panimanman o isipan, bang akalingwan o e na aganaka pa

iwaksi – pilit ilako bang akalingwan o e na aganaka pa, ilako king isipan, pansing o panimanman.

atwagan – kabud namu lakwan at ipagalang-bala o e na pansingan at e na paulagan ing ninu man o nanu man.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.