NAGPABILIN nga anaa gihapon sa 11 ang kumpirmadong kaso sa coronavirus disease (Covid-19) sa Northern Mindanao.

Kini ang gipahibalo ni Dr. Adriano Suba-an ang director sa Department of Health-Northern Mindanao.

Matud niini nga kini ang resulta as of April 20, 2020 kon diin sa maong gidaghanon, lima niini ang nakarekober human nga nagnegatibo na ang ilang ikaduhang testing.

Gikalipay niini nga lakip ang 33-anyos nga babaye nga taga Mahinog, probinsya sa Camiguin ang nagnegatibo na sa ikaduhang pagpa-testing niini.

Upat ang kumpirmadong namatay sa maong ihap ug karong panahona nagpabiling anaa sa balay tambalanan ang duha ka mga nagpositibo.

Sa bag-ong klasipikasyon sa Covid-19 patient sa DOH sa rehiyon, adunay 406 ka suspects kon diin 17 niini ang na-admit, 91 ang na-discharge, 203 ang outpatient ug 22 niini ang nakabsan sa kinabuhi.

Padayon nga gihangyo ni Subaan ang katawhan sa pagpuyo sa tagsa-tagsa ka mga panimalay aron dili na madugangan ang ihap sa mga mataptan sa virus.