MOKABAT 114 ka mga kanhi piniriso ang gipaubos sa recovery program nga gipangunahan sa Department of Justice (DOJ) ug Kagamhanan sa probinsya sa Misamis Oriental.

Gikalipay kini sa mga priso tungod kay nahatagan sila og kahigayonan nga magiyahan sa insakto nga dalan ug makasugod sa insakto nga pangkinabuhi.

Gibutyag ni Maria Bella Tigulo, kinsa chief sa Probation and Parole Office sa Misamis Oriental, nga usa kini sa programa ni Misamis Oriental Governor Bambi Emano kung diin ang Phase 1 mao ang therapy community program nga gisugdan niadtong bulan sa Hulyo hangtod ning bulan sa Nobiyembre.

"Kining programa sa therapy community program sa parole and probation office para ni sa atong mga prisoners nga parolees gikan sa 18 ka munisipyo sa Misamis Oriental," matud niini.

Dugang niini nga adunay 700 ka mga probationers ug parolees ug kinig 114 ka priso maoy nauna.

"Pagtudlo ni nila og balik lakip ang behavior-shaping nila sa ilang survival skills, emotional ug psychological, ug tanan pwede mahatag sa ila ani nga therapy alan pagbag-o sa ilang kinabuhi," matud ni Tigulo.

Sa iyang bahin, si Emano malaumon nga makatuon ug isulod sa kasing-kasing ang ilang natun-an aron dili na mahibalik sulod sa bilanggoan ang mga priso ug magkinabuhi nga matarong ug layo sa kriminalidad.

Kini gipahigayon niadtong adlawng Miyerkules, Nobiyembre 6, sa Capitol's Training Center.