MIABOT na sa 18,193 ang kinatibuk-ang ihap sa mga kumpirmadong kaso sa Covid-19 sa Cagayan de Oro City human 121 ka mga residente sa dakbayan ang positibo sa novel coronavirus.

Sumala sa City Health Office, sa 121 ka mga bag-ong lokal nga kaso, 54 ang mga local index, 36 ang mga close contacts sa mga pasyenteng nagpositibo sa coronavirus, 13 ang mga lokal authorized persons outside residence (Apors), usa ang Apor with link, 15 ang mga persons deprived of liberty (PDLs), ug duha ang mga patay.

Ang Cagayan de Oro adunay 3,746 ka mga aktibong kaso, 909 niini na-admit sa Northern Mindanao Medical Center ug uban pang mga ospital sa siyudad, 2,822 ang mga outpatient, ug 15 ang mga ROFs/LSIs.

Nakatala usab og 49 nga nakarekober sa sakit. Anaa na karon sa 13,672 ang ihap sa mga nakarekober sa dakbayan.

Ang ihap sa mga namatay sa Covid-19 sa dakbayan anaa na sa 775.