USA ka surprise drug test ang gipahigayon ngadto sa mga sakop sa Misamis Oriental Police Provincial Office headquarters sa Barangay San Martin, lungsod sa Villanueva, Misamis Oriental.

Kini naglangkob sa tanan staff sa police headquarters ug police mobile force commanders niadtong Martes, Pebrero 11, 2020.

Gibutyag ni Police Colonel Robert Roy Bahian, ang provincial director sa Misamis Oriental, nga tumong niini aron malimpyohan ang kapulisan nga mao sab ang direktiba nila ni Philippine National Police (PNP) chief Police Lieutenant General Archie Gamboa ug Presidente Rodrigo Duterte.

"This is on the spot surprise drug test among Misamis Oriental Police Officers and men conducted on the spot, unannounced, surprised drug test kasi we have a regular information conference every Tuesday conducted," pasabot ni Bahian ug miingon nga moabot sa 150 ka mga polis ang sorpresang na drug test ug posibleng aduna pay mosunod niini.

"This drug test is a manifestation of continuing sincerity to cleanses our own rank in support of chief PNP's directives and desire of President Duterte and the people in general whom we served," matud ni Bahian.

Kung adunay magpositibo sa maong drug test, manubag ang pulis ug posibleng mataktak sa serbisyo.