MOABOT ngadto sa 157 ka mga dyip ang nadakpan atol sa pagpatuman sa Land Transportation Office (LTO)-Northern Mindanao sa Anti-Smoke Belching Act sa area sa Barangay Carmen ug Cugman Highway, dakbayan sa Cagayan de Oro.

Matud ni LTO-Northern Mindanao Director Oscar Salcedo nga ikalima na kini nga operasyon sa ahensya nga pagpangdakop ug daghan gihapon ang masinupakon niini.

Gihimo kini nila tungod kay makadaot ang itom nga aso nga gibuga sa tambutso dili lamang sa ilang pasahero apan lakip sa kinaiyahan.

Sa gidaghanon sa nadakpan, mokabat sa 130 niini ang nakasupak sa Anti-Smoke Belching Act ug 12 ang ilang gi-impound.

Giisyuhan ang mga nadakpan og temporary operator's permit (TOP) ug gikuha ang ilang mga drivers’ license. Ang TOP mo dugay lamang og 72 ka oras gikan kini giisyu.

Matud ni Salcedo nga simple lamang ang buhaton sa mga driver aron mabawi ang ilang lisensya ug gikinahanglan lamang nilang ipa tune-up ilang sakyanan tungod kay parte kini sa limpyo nga maintenance sa ilang gidrayban.

Giklaro sab ni Salcedo nga wala pa sila nagpatuman denhi sa rehiyon og "tanggal bulok tanggal usok" nga gipatuman na sa kaulohan.

Gireklamo sab og maayo sa pipila ka driver ang gihimong pagpangdakop sa LTO tungod kay posibleng lakang na kini nga dili sila pabiyahion.

Matud ni Joel Gabatan, kinsa Regional Coordinator of the National Confederation of Transport Union in Northern Mindanao (NCTU) nga pagpang-ipit kini og maayo sa mga driver og operator ug paagi na kini sa pagphase-out.

Kahinumduman, adunay gikatakdang programa ang gobyerno nga i-phase out ang mga karaan na nga mga pasaherong sakyanan ug pulihan sa moderno ug maayo sa kinaiyahan.

Matud ni Gabatan nga kong matuman na kini nga programa andam na unta niini ang mga operator kay wala man silay mahimo.

"Andam naman unta ang mga operator sa phase-out bahalag daghan magsakripisyo. Ang amo iphase out na ug pulihan na dayon. Wala paman diay.

Naghimo og programa dili paman diay andam," batikos niini.