GITUOHANG nagkabulag sa uyab ug selos ang posibleng hinungdan pagpakamatay sa 16 anyos nga dalagita niadtong niaging adlaw sa lungsod sa Initao, Misamis Oriental.

Ang insidente unang narespondehan sa Initao Rescue Team diin ang biktima nakit-ang nagbitay gamit ang pisi ug gihikot sa haligi sa atop sa puloy-anan.

Gidala kini sa mga rescue team sa Misamis Oriental Provincial Hospital sa Gingoog City apan dead on arrival nga gideklarar sa mga doktor.

Sa inisyal nga imbestigasyon sa kapulisan sa Initao Police Station, gibutyag sa apohan ug iyaan nga gikan ang dalagita sa beach party kuyog ang iyang mga higala ug hinigugma niini.

Pasado alas 6 sa hapon, nauli kini nga naghilak ug deretsong misulod sa kwarto niini ug nagtikuko.

Nagtuo lang ang kabanay nga lango kini sa ilimnong makahubog apan pila ka minuto pagsusi nila sa dalagita nagbitay na ug luya kaayo.

Gani ilang gisuwayan og tangtang ang pisi sa liog niini ug nagpakitabang sa rescue team apan nakabsan sa kinabuhi pag-abot sa tambalanan.