NANIRADO sulod sa panimalay ang usa ka lalaki ug gipanamastamasan niini ang usa ka menor de edad niadtong alas 2:00 sa hapon sa Zone 6, Barangay Bonbon ning siyudad sa Cagayan de Oro.

Sikop si Lito Aratia, 37, minyo, residente sa Barangay Bonbon ning siyudad samtang ang biktima nag-edad og 17 anyos ug usa ka working student.

Sa pakighinabi kang Police Major Ian Borinaga, hepe sa Police Station 4 (PS4) sa Carmen gibutyag niini nga walay laing nahabilin sa balay gawas kanila sa dihang nahitabo ang pagpanglugos.

Gitakdang ipasaka na usab ang kasong pagpanglugos batok kay Aratia.

"Oo sila ra, giprepare pa ang documents," matud ni Borinaga.

Nasayran nga giingong mga alas 2:00 sa hapon nanirado ang suspek sa pultahan sa maong panimalay ug gihilamhilam ug gihilabtan niini ang pribadong parte sa lawas hinungdan nga nitaho kini sa kapulisan mga alas 6:05 sa gabii.

Positibo nga gitudlo sa biktima ang suspek rason sa pagka-aresto niini.

Gi-andam na sa kapulisan ang tukmang kaso nga ipasaka batok sa dinakpan.