BALHOG sa bilanggoan ang usa ka kanhi barangay tanod ug karon mag-uuma human giingong gilugos niini ang babaye nga barkada sa anak niini diha sa Barangay Plaridel, lungsod sa Claveria, Misamis Oriental.

Ang biktima nga itago sa ngalan nga Anjela, 19 anyos, ang giingong barkada sa anak sa suspek nga giilang si Arnold (bansagon gitago), 54, minyo.

Si Police Chief Inspector Raymund Lumapay, hepe sa Claveria Police Station, niingon nga nahitabo ang insidente niaging mga adlaw dihang lango sa ilimnong makahubog si Anjela ug anak sa suspek kay adunay selebrasyon niadtong tungora.

Nakatulog si Anjela sa balay ni Arnold tapad sa iyang anak apan natingala ang pamilya nga gauyog-uyog ang ilang panimalay ug nasapon sa asawa nga daling nag zipper kini.

Si Anjela giingong dili makadumdom sa nahitabo kaniya apan ang kabanay ni Arnold maoy kumbinsido nga adunay pagpanglugos nga nahitabo butang sab nga gihimakak sa suspetsado.

Wala pay resulta sa medical examination apan gi-inquest na sa korte si Arnold ug karon balhog na sa prisuhan sa Misamis Oriental Provincial Jail (MOPJ).