DUHA ka mga babaye ang gilugos sa akyat-bahay ug gikawatan pa niadtong Disyembre 16 sa Zone 2, Barangay Agusan ning siyudad sa Cagayan de Oro.

Priso si Roberto Hermita Jr., 25, ulitawo, residente sa Purok 5, Barangay Gusa ning siyudad kinsa giingong bag-o lang nakagawas sa prisohan tungod sa pagkalambigit niini sa iligal nga druga.

Sa pakighinabi sa SunStar Superbalita kang Police Chief Inspector Evan Viñas, hepe sa Police Station 6 (PS6) sa Puerto nga usa ka akyat-bahay ang suspek ug gipanglugos pa niini ang duha ka mga babaye.

“Gisak-an niya ang girentahan sa duha ka biktima nga babaye, duha,unya gilimas niya ang mga valuables, cellphones ug mga relo, kwarta, pagkakita niya nga dunay babaye naibog siguro siya, so iyang gilugos gipahimoslan gyud niya ang duha,” pahayag ni Viñas.

Human sa pagpanglugos nagpakitabang ang mga biktima sa katawhan ug narespondehan sa kapulisan nga anaa nagbantay usab sa Misa de Gallo hinungdan nga nasikop ang suspetsado.

Mag-atubang sa duha ka counts of rape with robbery human kini nasikop ug nakuha ang mga gamit sa mga biktima sa posisyon niini ug positibo usab kining gitumbok sa mga biktima.