NASAPON ang duha ka menor de edad ug laing dinakpan nga nagsuyop sa ilegal nga druga niadtong nilabay nga adlaw sa sulod sa inn nga nahimutang sa J.V Seriña Street, Carmen, dakbayan sa Cagayan de Oro.

Ang mga dinakpan naila nga sila si Jovannie Eduave, 18, ug duha ka 15 anyos nga residente sa Calaanan, Barangay Canito-an.

Sa nahipos nga impormasyon, gikabutyag nga nakadawat na lamang og tawag ang kapulisan kalabot na sa nahitabong ilegal nga kalihokan ilabi na pagsuyop sulod sa maong inn.

Dali usab nga girespondehan sa mga otoridad ang maong insidente ug malampusong nasikop ang mga suspetsado human nasapon mismong nagpot session.

Nakuha gikan sa mga suspetsado ilabi na sulod sa maong lawak ang mga drug paraphernalia ug duha ka mga pakete sa gitoohang shabu.

Sa pagkakaron kasamtangang gihan-ay ang mga importanteng dokumento alang sa posibleng kasong atubangon sa mga dinakpan.