HUGOT nga seguridad ipatuman sa kapolisan sa Police Regional Office (PRO)-Northern Mindanao ning pag obserbar sa adlaw sa mga Santos ug Kalag.

Kini ang gibutyag ni Police Lieutenant Colonel Mardy Hortillosa, kinsa miingon nga 8,000 ka mga polis ang gipakatag ngadto sa 232 ka mga sam-ang sa tibouk rehiyon.

Matud ni Hortillosa nga matag tuig, gakaubos ang ihap sa mga tao nga gadala og mga gidili sa sementeryo sama sa ginadili nga pagdala og hait nga hinagiban, ilimnong makahubog, sound box, ug pagpanigarilyo sa palibot sa sementeryo.

Ang kapolisan alerto sa pagbantay niini ug anaa sa full alert status, diin nagpasabot nga ginadili kanila ang mag leave niining panahona.

Nakigkoordinar na usab sila sa mga force multipliers sama sa mga tanod, traffic enforcers, bombero, kawani sa Department of Public Works and Highways, Land Transportation Office, Department of Transportation, Provincial Disaster Risk Reduction and Management Office ug Department of Health nga dako og papel diha sa pagpahapsay sa dagan sa trapiko, pag atiman sa mga nakuyapan o unsa man nga mga insidente nga gakahitabo.

Gipasabot ni Hortillosa nga kamandoan ni Police Regional Director Rafael Santiago Jr. ngadto sa mga motorista sa matag probinsya nga i-tsek ang ilang mga baterya, water, suga, hangin, gas, engine sa sakyanan sa dili pa molarga.

Samtang ang mga publiko ipabantay ug kinahanglan preparado kanunay.

Siguraduhon nga nakakandado ang tanang entrance ug exit sa paninalay sa dili pa mobiya alang sa ilang bakasyon.

"There will be personnel who will be deployed to conduct checkpoints in strategic locations and will undertake active security patrol in residential areas to prevent breaks-ins and akyat bahay incidents," matud ni Santiago.

Adunay mga road safety marshals nga ipahimutang lakip police assistance desk sa matag sam-ang.