MAS nidaghan ang katawhan ug mga deboto nga nilakip sa Traslacion sa Itom nga Nazareno atol sa kapistahan niini adlaw’ng Miyerkules, Enero 9 dinhi sa siyudad sa Cagayan de Oro.

Sa pakighinabi sa SunStar Superbalita kang Police Senior Superintendent Nelson Aganon, city director sa Cagayan de Oro City Police Office (Cocpo), una na niini nga gibutyag nga mas gilauman ang pagdagsa sa katawhan itandi niadtong nilabay nga tuig hinungdan nga mas gipahugtan ang seguridad ug natuman ang security plan ug nagmalampuson kini.

“Nasunod naman yung ating plano, kasi sinasanitized natin yung area para ma filter natin yung mga tao na pumapasok so medyo hinigpitan natin kasi ini expect na natin na lalaki yan kesa dun sa next year,” matud ni Aganon.

Samtang gibutyag usab ni Police Superintendent Mardy Hortillosa, tigpamaba sa Cocpo, nga mga anaa sa 250 mil ang katawhan atol niining kasaulogan lakip na ang mga nagsimba ug nag-vigil.

“250,000 ang ato estimate ana apil gabii ug sa nagsimba,” matud ni Hortillosa.

Matud usab ni Major Anshary Pumbaya, kumander sa Task Force Oro, nga susama ra gihapon ang seguridad nga gipatuman ug wala’y nakitang problema ilabi na nga nagmalinawon kini.

“Compare last year the same naa gyud nang mga challenges pero wala man problema kay atoa man na siyang natagaan og pagtagad bahin sa security plan ug nakita nato nga mas daghan karon ang tawo kaysa atong last year,” matud ni Pumbaya.

Dunay 150 kapin ang kasundalohan nga gipakatag samtang mga kapin usa ka libo usab ang kapulisan diin 836 niini ang naka-deploy samtang duna pa’y mga naka-estambay nga duha ka platoon.