TULO ka mga balay ang nasunog Dominggo sa buntag, Abril 21, sa Zone 3, Barangay Baikingon, ning siyudad sa Cagayan de Oro.

Nagsugod ang kalayo sa balay ni Gloria Cartajena ug laing duha ka abay nga balay nga gibana-banang moabot sa P50,000 ang damyos.

Sa nahipos nga impormasiyon giingong posibleng nagsugod ang kalayo sa kwarto nga giingong walay tawo niadtong higayon.

Sa wala pa nahitabo ang sunog dunay nadungog ang mga silingan nga kusog nga buto nga gisundan sa pag-ulbo sa kalayo.

Nakadawat og tawag ang tinugyanan sa Bureau of Fire Protection mga alas 7:35 ug nakontrolado ang maong kalayo mga alas 8:30 sa buntag.

Gitutokan usab karon sa mga bombero ang posibilidad nga nabiling mga gamit nga nakasaksak ilabi na ang cellphone.