KAPIN sa 300 ka mag-uuma nga nagmartsa ang giingong gibabagan sa kapulisan sa Barangay Maluko, lungsod sa Manolo Fortich, Bukidnon niadtong Biyernes Santo, Abril 19.

Ang maong mga mag-uuma giingong moapil unta sa protesta nga nagtitulo og Kalbaryo sa mga Kabus diin tumong niini ang pagpaabot sa gobiyerno sa ilang pagsupak sa martial law ug labaw sa tanan sila gikulang na sa pagkaon tungod sa mga pagpahigayon og operasyon sa militar ug nagkagrabeng pagpangbawi sa yuta nga ilang gitikad ug gipanag-iyahan.

Nahitabo ang pagbabag human nagduda ang kapulisan nga gipugos lamang sa mga mag-uuma pag-uban ang mga bantan-on. Apan giklaro sa mga mag-uuma nga ilang mga anak ang ilang kauban.

Si Police Lieutenant Colonel Surki Sereñas, tigpamaba sa Police Regional Office (PRO)-Northern Mindanao niingon nga ilang girespeto ang katungod sa bisan kinsa nga mobiyahe og malinawon nga mopahigayon og petisyon sa gobyerno.

Apan dili nila matugotan nga adunay mogubot sa pag-obserbar sa Semana Santa nga unta kini saulugon nga malinawon.

“We cannot allow flagrant defiance of the law, breach of peace and disorderly conduct in a supposedly peaceful and tranquil day of the lent,” pahayag ni Sereñas.

Ang pagbabag sa kapulisan sa mga mag-uuma usa lamang ka pagpahigayon sa naandan nga checkpoint alang sa seguridad sa katawhan.

“Government authorities are also ensuring that the group is not violating the law on trafficking in person and RA 7610 (Exploitation of minors),” matud ni Sereñas ug miingon nga ila pa nga gikoordinar ang Department of Social Welfare and Development kon ang mga batan-on nga kuyog sa mga mag-uuma dili biktima sa child trafficking.