UPAT ka barangay sa siyudad sa Gingoog, Misamis Oriental ang drug cleared na karong panahona.

Kini ang kumpirmasyon ni Police Lieutenant Colonel Ariel Philipp Pontillas, kinsa hepe sa Gingoog City Police Station.

"Naa napod tay na-clear nga barangay nga upat out of 79 barangay," pagkumpirma ni Pontillas, kinsa miingon nga gamay ra kaayo kini ug usa kini sa iyang labing dakong hagit sa iyang pagpamuno unsaon kini pag clear nga mga barangay.

Matud niini nga adunay mga nadawat nga inpormasyon nga nagpabilin sa lugar ang presensya sa ginadili nga druga ug ang ilang buhatan gihagit kon unsaon kini paglimpyo.

"Challenge sa new administration mao ang pagclear sa barangay meaning naa pay druga niabot sa Gingoog," matud niini ug niingon nga 85 porsiyento pa nga anaa ang ginadili nga druga. Hinuon dili na mga dagkong tao apan igo lamang nasuplayan gikan sa kasikbit nga siyudad ug gi resell sa Gingoog.

"In regards sa dagko, wala nata kay na neutralize nata sa past chief of police kay Colonel Lami-ing taas ang ilang mga operation sa drugs, so wala natay dagko," matud niini.

Dugang ni Pontillas nga ang mga tao nga sentro sa tokhang kon toktok hangyo ang naa na sa ilang listahan ug ila na kining tagsa-tagsaon pagtoktok sa ilang panimalay ug kung dili kini mohunong adunay himoung police digitization.