UPAT ka mga hardware sa siyudad sa Cagayan de Oro ang nasapong nagbaligya og mga substandard nga mga steel bars atol sa inspeksiyon niadtong Hulyo 4.

Gibutyag ni Atty. Edgardo "Egay" Uy, tsirman sa Cagayan de Oro City Price Coordinating Council (CPCC), nga giingong nakitang mga dagkong steel bars nga naay mga logo apan ang mga gagmay wala. Gidugang pa nga unta dunay color coding ang ipintal sa tumoy sa steel bar apan ang uban wala ug nagkalandrakas lang kini.

"Kadtong findings sa steel bars nga walay logo, walay marka, gi-forward pa to sa DTI (Department of Trade of Industry) provincial office didto sa head office," matud ni Uy.

Gidugang pa usab niini nga giwarningan na ang maong mga patigayon ug gani gihatagan kini og sumbanan nga maoy sundon dili lamang alang kanila apan sa mga kustomer aron nga dili kini ma-alkansi.

"Gi-isyuhan sila nga mao ni ang findings nga violation lugar, i-correct ninyo, murag warning, information campaign pa to, ang enforcement ana naa may enforcement bureau sa DTI sila na dayon ang mo follow up," dugang pa.