UPAT ka mga lalaki ang sikop sa kapolisan mga alas 4:00 sa hapon, Dominggo, Oktubre 6, human nga nagpaaway og damang o spider sa Barangay Poblacion, siyudad sa Valencia, Bukidnon.

Si Police Lieutenant Colonel Surki Sereñas, hepe sa Valencia City Police Office, niila sa mga dinakpan nga mao sila si Lawrence B. Tumlos, 32; Godofredo G. Cepeda, 42; Mario L. Das-ao, 50; ug Beleanio R. Netesa, 43, taga Valencia City.

Igo lamang nadawat sa kapolisan ang report nga nabibo ang palibot tungod sa pagpaaway sa upat sa damang, hinungdan nga giadtoan sa kapulisan.

Dinhi ilang nasapon ang upat ug giaresto tungod kay giingong usa kini ka matang sa ilegal nga sugal.

Nakuha sa ilang mga posisyon ang 32 ka mga buhing damang, stick, unom ka boxes nga gisudlan niini, ug ilang pusta nga P300.

Sa pagkakaron, nagtingkagol na sa prisuhan ang upat ka mga dinakpan kinsa gitakdang mag-atubang og kason kasupakan sa ilegal nga pagsugal.