AKTIBO na ang upat ka mga substation sa kapulisan ug mahimo na nga modangop ang katawhan nga magkinahanglan og tabang sa mga barangay Agusan, Bulua, Canitoan, ug Balulang.

Kini tungod na usab sa hangyo sa mga residente sa dapit ug nakitang dunay kakulangon niini.

Nasayran nga ibutang sa Taekwood ang usa ka substation sa Agusan ug sa Westbound terminal sa Barangay Bulua.

Gibutyag ni Police Colonel Henry Dampal, city director sa Cagayan de Oro Police Office (Cocpo), nga mga substation lamang kini ilabi na nga dili gyud ingon ana kadaghan ang personahe sa kapulisan nga mabutang niini.

Tumong niini nga daling makaresponde sa mga panginahanglanon sa katawhan.

“At least ang upat nga mga areas nga atong gitan-aw ato gyud gibutangan, dunay pulis atong makita anytime ana nga lugar with the support of the tanod, of the Barangay nga maka render ta og immediate response kung dunay call for police assistance,” matud ni Dampal.

Samtang mapasalamaton si Mayor Oscar Moreno niini ug gidayeg si Dampal.