GITUOHAN nga ang pagkagisi sa pribadong parte sa lawas sa 5 anyos nga batang babaye ang hinungdan sa kamatayon niini human giingong gilugos sa iyang uyoan sa dakbayan sa Valencia, Bukidnon.

Si Police Lieutenant Colonel Surki Sereñas, hepe sa Valencia City Police Office, nibutyag nga alas 8 sa buntag nagpatabang ang nagpakabanang residente kalabot sa giingong kaso sa pagpanglugos.

Miresponde ang mga imbestigador ug dinhi naila ang biktima nga taga Poblacion, susamang siyudad.

Sa dugang nga imbestigasyon, nasuta nga ang biktima gibilin ngadto sa uyoan niining giilang si alyas Mac-mac, igsuon sa inahan sa bata human nga naglalis ug wala nagkasinabot ang mga ginikanan.

Giingong buntag na dihang giadtoan sa amahan sa balay sa uyoan apan gikakurat niining tulog pa kini nga gibukotan og habol.

Gani niuban pa og dala ang uyoan kuyog sa amahan sa biktima paingon sa Polymedic Hospital sa Valencia City apan dead on arrival ug didto nadiskubre sa mga doktor nga labihan kagisi ang pribadong parte sa bata nga halos miabot sa sampot niini.

Samtang ang suspetsadong uyoan dali nga misibat apan nasikop ra usab kini sa gipahigayon nga hot pursuit operation sa kapulisan.

“Nag-struggle og maayo ang bata, lacerated ug namatay gayud siya sa hirap,” matud ni Sereñas sa Superbalita Cagayan de Oro.

Dugang niini nga unang higayon kini niya naagbat nga klase sa insidente nga usa ka uyoan walay kaluoy sa kaugalingong pag-umangkon.

“Karon pa ko nga naa diay tawo ingon ana. Louy kaayo, karon pako,” pahayag niini.

Sa pagkakaron, anaa detinado sa Valencia Police Station ang suspek kinsa patong-patong nga kaso ang atubangon niini.

Daghan ang nagsubo sa kamatayon sa bata ug bisan sa social media suk-anon ang mga netizens sa pagsinggit nga unta ibalik gyod ang death penalty sa mga kasong susama niini.