NAKURYENTE ang lima ka mga lalaki nga pulos nagtrabaho sa deep well sa Barangay Sta. Ana, lungsod sa Tagoloan, Misamis Oriental.

Mikirig ug adunay nibuto sa bahin sa kamot ug tiil sa mga biktima nga giilang sila si Ernesto Bachinicha, 51; Romer Yacapin, 33; Dionisio Mahalidan, 54; Darwin Capuli, 20; pulos minyo ug usa ka ulitawo nga mao si Melchor Sugabo, 17, pulos residente sa susamang dapit.

Sa inisyal nga imbestigasyon nasuta nga kining mga biktima nagtrabaho sa deep well tungod wala miagas ang tubig.

Samtang ilang gihublot ang tubo misagyad kini sa live wire sa kurente hinungdan nga mikirig ang mga biktima ug duna pay milagpot.

Giingong 34 KV line ang maong kurente apan maayo na lamang nga nibuto ang transformer hinungdan nga dili kaayo grabe ang nahitabo sa mga biktima.

Gipangdala ang mga biktima sa Polymedic sa lungsod sa Tagoloan samtang dunay pipila gidala sa Northern Mindanao Medical Center sa Cagayan de Oro.

Sa pagkakaron ang mga biktima ang giingong anaa na sa luwas nga kahimtang. (SVB)