LIMA ka mga sakop sa New People’s Army (NPA) ang napatay sa sunod-sunod nga enkwentro sa kasundalohan batok kanila sa Caraga region.

Ang mga elemento sa 36th Infantry (Valor) Battalion samtang nagpahigayon og security operation nakaengwentro og dili mominos napulo ka NPA sa Barangay Cancavan, Carmen, Surigao del Sur nga miresulta sa kamatayon sa upat ka walhong grupo.

Nakuha sab gikan sa mga patayng lawas ang tulo ka AK47 Rifles, duha ka M16 Rifles, duha ka magazines sa M16, cellphone ug uban gamit.

Duha sab ka engkwentro natigayon sa Agusan del Norte nga gilangkoban sa platoon gikan sa 29th Infantry Battalion nga miresulta gihapon sa kamatayon sa usa ka sakop sa NPA ug pagkasakmit sa laing AK47 rifle.

Wala pay mga identipikasyon ning panahona ang mga namatay nga sakop sa NPA apan gipahiluna na ang ilang mga patayng lawas.

Si Colonel Maurito Licudine, kinsa Commander sa 402nd Infantry (Stingers) Brigade, niingon nga kini maoy dangatan sa mga walhong grupo nga daw pabilin nga magmagahi sa ilang mga panawagan nga mosurender.

“We want to send a message to the CNTs that they either surrender or face the consequences of being decimated,” matud niini ug midugang nga biktima kini sila sa mga manipulasyon ug desepsyon sa ilang mga lider.