MOABOT sa lima ka mga drug suspects ang napatay niining tuig sa illegal drug operation nga gikasa sa kapulisan sa Misamis Oriental Provincial Police Office (Moppo).

Matod ni Police Inspector Princess Joy Enriquez, tigpamaba sa Moppo, nga sa tuig 2018 hangtod Enero 2019 moabot ngadto sa 267 ang drug operation nga gikasa sa kapulisan.

26 ang napatay sa tuig 2018 ug nadugangan sa lima karong bulan sa January.

Niadtong Biyernes sa gabie, Enero 18, si Marvin Nara, residente sa Sinai, lungsod sa Laguindingan Misamis Oriental, maoy pinaka uwahing napatay sa drug operation.

Gibutyag ni Enriquez nga ang kapulisan sa Provincial Drug Enforcement Unit ug kapulisan sa Laguindingan maoy nagsilbi sa search warrant dihang giingong misukol ang suspek didto sa lawak nga bahin sa puloy-anan niini ug nagpabuto makatulo ka higayon gamit ang 38 kalibre.

Butang nga naalerto ang kapulisan ug gibalosan kini hinungdan nasamdan. Gidala kini sa balay tambalanan apan nakabsan kini sa iyahang kinabuhi.

Sa crime scene nahipo ang kalibre sa suspek uban sa tulo ka basiyo sa bala. Nakuhaan usab kini og walo ka pakete sa gitouhang shabu.

Ang pamilya sa suspek dili makatoo nga aduna kini illegal nga gikalambigitan tungod aminado lamang sila nga ang bisyo niini mga babae lamang ug manok.

Apan depensa ni Enriquez nga dili mamatay ang mga drug suspek kon wala kini musukol.

“We assure the public that we continually observed human right in police operation, may mga circumstances lang na dili ma-avoid especially my resistance sa subject at kung mangyari man yan we first protect ourselves,” matud ni Enriquez. (SVB)