SA KINATIBUK-AN, moabot ngadto sa 16 ka mga illegal gambling operation ang gipahigayon sa sunod-sunod nga operasyon sa mga police station sa Misamis Oriental.

Kini subay sa kamandoan ni Police Senior Superintendent Rolando Destura kinsa provincial director sa Misamis Oriental Provincial Police Office.

Gimando niini ang one time big time operation batok illegal nga suga ug denhi moabot ngadto sa 16 ka mga operasyon ang natala.

Moabot sa pito ka operasyon batok illegal nga tari-tari; tulo niini ang ilegal nga tong-its; usa sa bingo ug mahjong.

Sa kinatibuk-an, 50 ka tao ang nadakpan diin usa niini minor de edad.

Sagad sa operasyon gipahigayon niadtong Semana Santa diin namatikdan nga adunay mga pagtari-tari ang natigayon.

Gawas sa mga bet money nga nakumpiska nasakmit sab ang mga nagkadaiyang illegal gambling paraphernalia lakip ang usa ka tolilong ug video karera.

Gipasalig ni Destura nga magpadayon ang operasyon niini aron mahimong illegal gambling free ang probinsya sa Misamis Oriental.