MOABOT ngadto sa 523 ang ihap sa kasong teenage pregnancy nga natala sa probinsya sa Misamis Oriental.

Kini ang gipahibalo ni Provincial Population Officer Andrew Gapuz atol sa iyang special report kagahapon sa pagpakayab sa nasudnong bandila sa kapitolyo probinsyal.

Gibutyag niini nga ang pinakataas og kaso niini sugod sa bulan sa Marso ngadto Septiyembre ning tuig nagikan sa lungsod sa Tagoloan nga adunay 77; gisundan sa Naawan nga 64; Jasaan, 56; Magsaysay, 52; Manticao ug Salay, 42; Lugait, 40; Villanueva, 24; Talisayan, 21; Balingoan, 19; Medina, 18; Alubjid, 17; Lagonglong 12; Binuangan, 12; Laguindingan, 11; Gitagum, 9; Libertad, 7.

Gihimong lakang sa buhatan karong panahona nga maubsan kini ang padayon nga education campaign batok sa sex education ngadto sa mga tunghaan sa high school sa lalawigan aron ipasabot kanila kung unsay epekto niini.

Gipahimangno sab niini nga likayan ang pre-marital sex kon pakighilawas nga wala pay kasal.