UNOM ka mga indibidwal ang nakalapas sa curfew ang gipasakaan og kaso human wala nipatoo ug nanipa pa sa tanod ug sa pulis atol sa pagsita.

Ang maong unom ka indibidwal pasakaan og kasong direct assault ug disobedience to agent of person in authority.

Gibutyag ni Police Major Evan Viñas, tigpamaba sa Cagayan de Oro Police Office (Cocpo), nga nanipa ug gitadyakan pa ang tanod.

"Related sa curfew pero nagsukol-sukol sa tanod ug sa atong pulis, gisipa gitadyakan nila ang tanod," dugang ni Viñas.

Gidugang pa nga kulang ang respeto niini ilabi na sa mga tanod.

"Gisipa ang tanod, kulang ilang respeto gyud sa tanod ug naay pulis behave," dugang pa.

Apan gani usa ka pulis nga anaa nakadestino sa Police Station 3 (PS3) sa Agora ang gisukmag niini sa dihang gisita atol sa pag-implementar sa curfew.

Anaa usab sa 77 ka indibidwal ang nasita sa pinakaulahing tala sa kapulisan sa ilang pagpatuman sa ordinansa sa dakbayan.

Nasayran nga gipatuman ang curfew matag alas 9:00 sa gabii hangtod alas 5:00 sa buntag human sa pagpaubos sa community quarantine sa dakbayan sa Cagayan de Oro.