PATAY ang 60-anyos nga babaye human nabanggaan sa pick-up truck alas 4:30 sa kadlawon sa Martes, Septiyembre 24, sa Barangay Mauswagon, lungsod sa Laguindingan, Misamis Oriental.

Giila ang biktima nga si Alice B. Dablio, residente sa susamang barangay.

Naabtan sa kapolisan sa Alubijid Police Station uban ang mga responders ang biktima nga nagbuy-od daplin sa kalsada ug naligo sa iyang kaugalingong dugo.

Kini nabanggaan sa usa ka pick-up truck nga gimaneho ni Erwin Pascua, 50, minyo, taga Kauswagan, dakbayan sa Cagayan de Oro, kung asa ang gimaneho niini rehistrado sa Alrose Farm Inc.

Si Pascua didto misurender sa Gitagum Police Station ug miasoy sa kapolisan nga samtang nagdagan wala niya namatikdan nga nagtabok ang biktima sa 6 lanes ug uwahi na niyang nadiskubre dihang nabanggaan na kini.

Ang kapolisan uban ang Laguindingan Rescue Ambulance ang daling midala sa biktima didto sa OWWA Hospital sa lungsod sa Alubijid, apan tungod sa grabeng naangkon sa biktima sa iyang ulo resulta gideklarar kini nga dead on arrival sa mga doktor.

Ang suspek gibalhin na sa prisuhan sa Laguindinan Police Station kinsa gitakdang mag-atubang og kasong reckless imprudence resulting to homicide.